SERAT TRIPAMA

SERAT TRIPAMA

(Anggitanipun KGPAA Mangkunegara IV)

Yogyanira kang prajurit

lamun bisa samya anulada

kadya nguni caritane

andelanira sang Prabu

Sasrabau ing Maespati

aran Patih Suwanda

lalabuhanipun

kang ginelung tri prakara

guna kaya purunne kang denantepi

nuhoni trah utama

Lire lalabuhan tri prakawis

guna bisa saniskareng karya

binudi dadi unggule

kaya sayektinipun

duk bantu prang Manggada nagri

amboyong putri dhomas

katur ratunipun

purunne sampun tetela

aprang tandhing lan ditya Ngalengka aji

Suwanda mati ngrana

Wonten malih tuladan prayogi

satria gung nagari Ngalengka

sang Kumbakarna namane

tur iku warna diyu

suprandane nggayuh utami

duk awit prang Ngalengka

dennya darbe atur

mring raka amrih raharja

Dasamuka tan keguh ing atur yekti

De mung mungsuh wanara

Kumbakarna kinen mangsah jurit

mring kang rak sira tan lenggana

nglungguhi kasatriyane

ing tekad datan purun

among cipta labih nagari

lan nolih yayahrena

myang luluhuripun

wus mukti aneng Ngalengka

mangke arsa rinusak ing bala kali

punagi mati ngrana

Yogya malih kinarya palupi

Suryaputra Narpati Ngawangga

lan Pandhawa tur kadange len yayah tunggil ibu

suwita mring Sri Kurupati

aneng nagri Ngastina

kinarya gul-agul

manggala goloning prang

Bratayuda ingadegken senapati

Ngalaga ing Korawa

Minungsuh kadange pribadi

aprang tandhing lan sang Danajaya

Sri Karna suka manahe

dene sira pikantuk

marga dennya arsa males-sih

ira sang Duryudana

marmanta kalangkung

dennya ngetog kasudiran

aprang rame Karna mati jinemparing

sumbaga wirotama

Katri mangka sudarsaneng Jawi

pantes lamun sagung pra prawira

amirita sakadare

ing lalabuhanipun

aja kongsi mbuwang palupi

manawa tibeng nistha

ina esthinipun

sanadyan tekading buta

tan prabeda budi panduming dumadi

marsudi ing kotaman